Assalamu’alaikum, kanca-kanca.
Ditepangake
disik aku Yuyun. Ing wektu iki, aku mung pengin andum pengalaman nulisku. Saiki
aku wis lungguh ing semester 6 Pendidikan Basa Jawa FKIP UNS.
Oke,
emmm… aku bingung ameh miwiti saka ngendi.
Dadi,
aku lumayan seneng nulis, nulis crikak, nulis geguritan, nulis berita, nulis
story, nulis status, nulis sms, nulis WA, nulis materi, nulis...... Ya pokoke
aku seneng nulis lah. Jane aku seneng nulis wis kawit SMA, tapi agi-agi iki aku
temenan olehku nulis. Kebetulan banget, tanggal 5 Mei wingi crikakku dipacak
ing salah sawijining majalah basa Jawa, Djoko Lodang. Crikakku iki wis tak
tulis suwe banget, tapi lagi dimuat minggu wingi. Amarga nalika ngirim ing
majalah ngono iku antrine uaaakiiiihhhh buanget sumpah :( .
Jan jane ta, iki crikakku sing nomer loro sing dipacak neng majalah, tapi aku pengen mosting sing iki wae, hehe.
Jan jane ta, iki crikakku sing nomer loro sing dipacak neng majalah, tapi aku pengen mosting sing iki wae, hehe.
Langsung
wae rasah nunggu suwe-suwe, merga nunggu suwe iku gak kepenak, hmm.
Iki
crikakku teng tereng tereng.............
Sorry ya menawa garing, aku dudu pelawak😓
aja
diguyu, merga iki ya lagi sinau :( 😍
Suruping Mega
ing Pungkase Pangrasaku
Nalika mega ing akasa padha mamerake sumorot emas ing
sisih wetan, aku mlaku ing pinggir trotoar dalan gedhe ing sacedhake kampusku.
Angin surup wus anyak tumeka. Warna jingga ing sawetane cakrawala uga melu
nyekseni kedadeyan iku.
Aku ngingeti pawongan lanang klamben hem ireng lan wong
wadon kang ayu rupane. Wong loro iku agi omong-omongan sajak serius. Wong wadon
kuwi nganggo klambi abang lan kathok jeans werna biru dhongker. Kekarone katon
padudon. Saya suwe, jebul langkahku sansaya cedhak marang wong loro iku.
“Aku ora ngerti apa-apa, pokoke awakmu kudu tanggung
jawab!” kira-kira ngono omongane wong wadon iku.
“Aku uga ora nglakokne apa-apa. Wengi kae awakku lagi ora
penak. Dadi awakmu ora usah nuduh lan nuntut aku sembarangan tanpa bukti!”
piwalese wong lanang iku.
Krungu iku, aku kaget banget. Dudu kaget amarga apa kang
lagi diomongake wong loro iku, ananging aku kaget nalika wong lanang iku
ngingeti aku lan aku… “Mas Endro?” pitakonku ndadak.
“Dhik, Dhik Lastri… awakmu ngapa eneng kono?” pitakone
sing swarane malih samar-samar ing kupingku. Sanalika aku langsung mbalik lan
mlayu saka papan kuwi. Dene wong wadon klambi abang mau katon bingung lan
nakokake aku ki
sapa. Keprungu adan Magrib aku langsung mlayu menyang kamar mandi ing masjid,
nangis, lan sabanjure nglakoni kawajibanku minangka titahing Gusti.
Ora ngira, jebul Mas Endro karo wong wadon mau nututi aku.
Ananging aku wegah nemoni. Sakbubare salat, aku lunga ngono wae ninggalake wong
loro mau ing ngarep masjid. Aku ora nyana, jebul Mas Endro tega nguciwakake
atiku. Aku sing wis pirang-pirang taun pacaran karo Mas Endro, kanti gampange
Mas Endro cidra marang aku.
“Dhik, mandheko! Iki ora kaya sing kokpikir. Aja salah
tampa, Dhik!”
“Wis ora perlulah Mas njelasne apa-apa. Aku wis krungu
kabeh mau. Ora ngira aku Mas awakmu tega, apa meneh nganti nglakoni… ah… wislah
Mas. Bejat banget awakmu. Jaremu apa? Minggu ngarep awakmu meh ngapa? Batalne
wae!” aku mangkel, ora bisa mikir kanti cetha maneh. Aku ngingeti pawongan loro
iku, wong wadon mau isih neng kono. Dheweke takon marang Mas Endro, lan Mas
Endro njelasne menawa aku ki kakasihe ananging kanti ati-ati lan katon wedi
diamuk dening wong wadon mau. Ngingeti Mas Endro sing kaya mangkono, aku
mangkel.
Aku banjur mlayu menyang ndalan saprelu nyegat angkot. Aku
gage mlebu ing angkot kuwi. Saka kaca spion, katon Mas Endro mlayu-mlayu lan
isih padudon karo wong wadon mau. Mas Endro ngendhek ojek lan nggacar angkot
sing tak tumpaki mau, ngebut banget. Sopir angkot bingung lan nakoki aku apa ana perlu karo
aku, tak wangsuli, “boten pak, boten sah mandhek.”
Nalika angkot arep ngliwati prapatan, ojeke Mas Endro
katon cedhak banget, ing sisih kiwa angkotku jebul ana trek sing playune ngebut
banget. Sanalika aku krungu swara rem kang banter banget lan swara mak brakkkkk. Pandelengku
abu-abu, saya suwe saya ilang, ing batin aku kandha… Mas Endro…
Ing rumah sakit, aku ngerti ana wong wadon mau, bapak
ibuke Mas Endro lan keluwargaku. Kabeh padha nangis gero-gero. Aku bingung, ana
ngendhi Mas Endro? Pikiran ku uwis ora karuan. Aku bisa anyak rada tenang
nalika wong wadon mau miwiti crita.
“Kula nyuwun ngapunten,
Bu. Kula Raras, rencange Mas Endro ing kampus. Kula nyuwun ngapunten menawi
amargi kula, Mas Endro lan Mbak Lastri dados salah paham. Dinten Senin dalu
wingi, kula wonten praktik ing kampus. Tiyang 10 kalih Mas Endro lan dosen
kula. Mas Endro jumeneng ing sandhing kula lan sandhing kula wonten
cairan-cairan kimia. Kula kirang mangertosi kengeng punapa kok ndadhak Mas Endro
nyenggol kula. Sanalika kula langsung ambruk lan nyenggol cairan-cairan punika
ngantos kutah lan nyebabake kebakaran ing ruangan laborat. Kula
nggih boten ngertas punapa-punapa. Ndelalah wingi,
rencang kula Ibnu mpun njelasaken dateng pulisi menawa dheweke kang nyebabake
masalah punika. Ibnu kakean gojek ing ruangan lan boten saged ngontrol polah
awake saingga nyenggol Mas Endro lajeng Mas Endro nyenggol kula lan kula
nyenggol cairan bahaya wau.” Raras njlentrehake kanti rasa salah lan matane
kaca-kaca.
Aku nangis, aku uga ngrasa salah wis nuduh Mas Endro sing
ora-ora lan suuzon
marang Mas Endro uga marang Raras. Aku bacut nibakake awakku ing kursi
ngarep ruangan oprasi ing rumah sakit. Wong-wong iku padha meneng wae marang
aku.
“Ibu, Mas Endro pundi, Bu? Kahanane Mas Endro pripun, Bu?”
pitakonku ora bisa ndelikake tangisku. Nanging ibu meneng wae. Aku takon marang
ibuke Mas Endro uga padha, ora ana saurane.
Dhokter metu saka ruangan lan ndhungkluk katon rasa sedhih
ing netrane.
“Ngapunten. Bu. Putra panjenengan boten saged dipuntulung
malih. Sabar nggih, Bu.” Ah, ora mungkin Mas Endro ninggal.
“Mas Endro arep nglamar aku minggu sesok. Ora, Mas Endro
ora etok ninggal!” aku nangis kejer. Wong tuwaku, wong tuwane Mas Endro luwih
kejere saka tangisku. Kabeh padha ngrangkuli ibukku. Dene Raras uga melu nangis
lan ngucapake, “Sabar, Bu. Mugi putrane panjenengan saged tinampi ing
ngarsanipun Gusti.”
Aku isih urung bisa nampa kasunyatan yen Mas Endro wis
ninggalake aku salawase. Aku ndhungkluk, nutupi raiku nganggo tanganku supaya
swara tangisku bisa suda bantere. Ujug-ujug ana
swara playu lan napas sing ngos-ngosan nyedhaki kabeh wong ing kene.
“Bu, Dhik Lastri pripun, Bu?” pitakone marang ibuku sing
njalari aku bingung?
“Sing sabar ya, Le. Lastri wis ditimbali dening Gusti.”
Wangsulae ibuke Mas Endro. Wangsulan iku agawe Mas Endro katon arep ambruk lan
agawe aku langsung ngadhek mak nyat.
“Ora, ora Bu! Lastri bisa slamet, Bu! Iki kabeh salahku!
Salahku, Bu! Aku ora bisanjaga Lastri! Salahku, Bu! Dhik Lastriii…” tangise Mas
Endro, banyu bening mili deres saka pojok netrane. Dene kabeh uwong mau padha
nututi jenazah sing disurung ing kasur lan parane ing kamar jenazah. Nalika Mas
Endro mbukak kain sing nutupi jenazah kuwi, aku ngerti. Jebul, aku sing
ninggalake Mas Endro lan keluwargaku. Aku gela, gela banget. Aku gela ora gelem
ngrungokake penjelasane Mas Endro nalika kae.
Aku mung bisa ngingeti lan ngrungokake tangise Mas Endro
lan keluwargaku. Aku ndrodhok, bingung kudu piye. Wayahe wis surup ngene
ananging cakrawala katon padhang, sumorot bagaskara agawe sulap netraku,
tangise keluwargaku agawe trenyuhing nalaku. Waspa sing mili kadya swara udan
sing tinampi dening bumi. Gusti, tulung jaganen keluwarga lan Mas Endro. Tak
pasrahake marang keluwargaku, kepiye aku bakal dieling-eling. Mas Endro, tak
pasrahke mring sliramu, kepiye kowe bakal nglilakne aku. Aku lunga.
T A M A T
Nah. saiki sapa sing durung ngerti majalah Djaka Lodang? Majalah Djaka Lodang yaiku minggon Basa Jawa sing terbit saben dina Setu. Redaksi majalah iki ana ing kutha Yogja. Para kanca bisa mirsani profil majalah Djaka Lodang ing kene
Para kanca, saliyane nulis crikak, ana kaprigelan liya kang isih ana sesambungane karo crikak, yaiku maca crikak. Sing dakmaksud iki dudu sembarang maca, ananging uga nggatekake pocapan, pelafalan, intonasi, lan liya-liyane, nah para kanca bisa nonton tuladha pamaosan crikak ing kene. Mangga dipirsani:) ing ngisor iki aku uga maringi tuladha pamaosan crikak dening sumber sing bedha, ayooo check it out :D